Son d’Aldea 2017

Santiago de Albá, Palas de Rei (Lugo)
1 e 2 de Setembro

Compra anticipada

Aproveita os descontos por compra anticipada!!

Compra anticipada de entradas

Presentación Son d’Aldea 2017

Prezadas e prezados amadoras e amadores do mundo rural:

No Son d’aldea 2017 viaxaredes no tempo, devagar, imaxes, lugares, persoas, ecoará a voz, o son dos anos corenta e cincuenta do século pasado. Mergullarédesvos nun remuíño de sensacións agudas e certas, perdéndovos polos escenarios que xa estamos a ensaiar, a través dos que traeremos o recordo moito do que nos falta no mundo de hoxe. Escenarios construídos con agarimo e sensibilidade, con dedicación, esforzo e tempo, con risas, ánimo e nervios. Veciños de Albá e Santo Xusto, persoas chegadas de Arzúa, Compostela, Borneiro, Laxe, Taboada, Chantada…, todos eles recrean este mundo único, íntimo, o mundo da aldea, un día enteiro de vivencia aldeá, de amor polo que somos.

A vosa contribución económica propicia a recuperación e posta en valor de espazos, lendas, historias verdadeiras que aconteceron, vocabulario esquecido, cancións, contos, espíritos que vagan polos camiños…. A vosa contribución económica favorece a interacción e o contacto entre as persoas destas aldeas, aldeas de Galiza, o coñecemento dos costumes, das crenzas, da verdadeira historia e vida dos heroes e heroínas anónimos polas que a miúdo foron desairados, e ata desprezados e tidos en menos. Hoxe, mercé a vós, terán estima e aplauso. Hoxe darémoslles as grazas, e mirarémolos con aprecio.

O que ides ver e percibir é froito de máis de cen persoas ao longo de varios meses de reunións e ensaios, é froito dun inxente esforzo e tempo consciente dedicado. Máis de cen persoas, coordinadas, aportando o que cada unha pode e como mellor sabe, todas con enorme ilusión.

Moitas grazas pola túa participación!!! Sen ela proxectos coma este non poderían ser realidade!!!

Que é Son d’Aldea?

Son d’Aldea é unha actividade dinamizadora da cultura rural que procura amosala, proxectala e dignificala a través dunha xornada de participación activa das persoas que se acheguen a Albá (Palas de Rei, Comarca da Ulloa) nesa xornada festiva.Trátase dunha aproximación ás coordenadas sociais e culturais do rural no pasado, e dunha reflexión sobre novas vías de ruralidade no presente.
 
Un recoñecemento á súa riqueza e á súa heteroxeneidade a través dun espectáculo teatral que transita por diferentes escenarios e que ofrece unha visión de diversos oficios do rural galego a mediados do século XX; dun Xantar con produtos elaborados por xente que traballa no rural na actualidade e dunha Romaría Tradicional que pechará este evento.
 
Esta xornada acompáñase dunha Mostra de Artesanía Alimentária e outra de Oficios Artesáns, que pretenden amosar as novas formas da economía na aldea. Unha radiografía subxectiva da situación do rural cargada de emoción e sensibilidade e con vontade de reflectir a filosofía vital do ser humano que habita esa contorna.